महामानव डॉ. बाबासाहेब आंबेडकर यांचा सप्टेंबर महिन्यातील संपूर्ण जीवनपट किंवा दिनविशेष (Timeline of Dr Babasaheb Ambedkar in September) या लेखामध्ये समाविष्ट आहे. ही डॉक्टर बाबासाहेब आंबेडकर यांची माहिती महत्वाची आहे.
वेगवेगळ्या वर्षांतील सप्टेंबर महिन्यात बाबासाहेबांच्या आयुष्यात खूप साऱ्या ऐतिहासिक घटना घडल्या. सप्टेंबर महिन्यातील डॉक्टर बाबासाहेब आंबेडकरांचा इतिहास या जीवनपटाच्या माध्यमातून उलगडण्यात आलेला आहे.
Timeline of Dr Ambedkar in September
बाबासाहेबांच्या ऐतिहासिक घडामोडींसह काही जागतिक वा आंतरराष्ट्रीय दिन, राष्ट्रीय आणि प्रादेशिक दिन, तसेच प्रसिद्ध व्यक्तींचे स्मृतिदिन व जयंती, यासारख्या बाबींचा देखील समावेश या लेखामध्ये करण्यात आला आहे.
सप्टेंबर महिन्यामध्ये घडलेल्या डॉ. बाबासाहेब आंबेडकरांच्या जीवनामध्ये घडलेल्या काही महत्त्वपूर्ण घटनांमध्ये — ‘बाबासाहेब’ संबोधनाची सुरुवात, कायदेमंत्री पदाची शपथ, मिलिंद महाविद्यालयाच्या इमारतींची कोनशीला, समाज समता संघाची स्थापना, दुसऱ्या गोलमेज परिषदेची सुरुवात, म. गांधी यांच्याशी दुसरी भेट, पेरियार यांच्याशी भेट, बौद्धधर्म स्वीकारण्याची तारीख जाहीर, पुणे करार, कायदेमंत्री पदाचा राजीनामा… यासारख्या गोष्टी समाविष्ट होतात.
Timeline of Dr Babasaheb Ambedkar in September
सप्टेंबरमधील डॉ. बाबासाहेब आंबेडकरांचा संपूर्ण जीवनपट
1 सप्टेंबर
- 1951 : औरंगाबाद येथे डॉ. बाबासाहेब आंबेडकरांनी स्थापन केलेल्या पीपल्स एज्युकेशन सोसायटीच्या विद्यमाने सुरू केलेल्या मिलिंद कॉलेजच्या नव्या इमारतींची कोनशीला स्वतंत्र भारताचे राष्ट्रपती डॉ. राजेंद्र प्रसाद यांच्या हस्ते करण्यात आली.
- 1951 : डॉ. बाबासाहेब आंबेडकर लिखित ‘बुद्ध उपासना पाठ’ ही बुद्ध वंदनाची पुस्तिका प्रकाशित झाली.
2 सप्टेंबर
- 1946 : जवाहरलाल नेहरू यांच्या अध्यक्षतेखाली हंगामी सरकारची स्थापना झाली.
- 1953 : भाषिक राज्य निर्मिती विषयक विधेयकावर डॉ. बाबासाहेब आंबेडकरांचे भाषण झाले.
- 1954 : राज्यसभेत अनुसूचित जाती आणि अनुसूचित जमाती विषयक आयोगाच्या चर्चेत डॉक्टर बाबासाहेब आंबेडकर सहभागी झाले.
3 सप्टेंबर
- 1946 : नागपूर येथे शेड्युल्ड कास्ट्स फेडरेशन तर्फे ‘पुणे करार’ विरोधी सत्याग्रह करण्यात आला.
4 सप्टेंबर
- 1925 : महात्मा फुले पुतळ्याचा ठराव पुणे नगरपालिकेत चर्चेला आला.
- 1927 : डॉ. बाबासाहेब आंबेडकरांनी समतेचा कार्यप्रचार करण्यासाठी ‘समाज समता संघ’ ही संस्था स्थापन केली.
- दादाभाई नौरोजी जयंती (1825)
5 सप्टेंबर
- 1932 : वढाळा येथील गणेश उत्सवात डॉ. बाबासाहेब आंबेडकरांचे भाषण झाले.
- 1936 : पतितपवन हे साप्ताहिक नागपूर येथे प्रसिद्ध झाले.
- राष्ट्रीय शिक्षक दिन (सर्वेपल्ली राधाकृष्णन जयंती 1888)
6 सप्टेंबर
- 1930 : डॉ. बाबासाहेब आंबेडकरांना गोलमेज परिषदेचे निमंत्रण देण्यात आले.
- 1943 : डॉ. बाबासाहेब आंबेडकरांच्या उपस्थितीत त्रिपक्षीय मजूर परिषदेचे दुसरे अधिवेशन झाले. अन्न, वस्त्र, निवारा, शिक्षण, सांस्कृतिक साधने आणि आरोग्याचे साधने याविषयी कामगारांच्या मागण्यांबद्दल बाबासाहेबांनी विवेचन केले. (6-7 सप्टेंबर 1943)
- 1954 : वर्गीकृत जाती आणि अन्य जाती आयुक्त यांच्या प्रतिवृत्तावर डॉ. बाबासाहेब आंबेडकरांचे भाषण झाले.
7 सप्टेंबर
- 1931 : दुसरी गोलमेज परिषद लंडन येथे सुरू झाली. 7 सप्टेंबर ते 1 डिसेंबर 1931 – दुसऱ्या गोलमेज परिषदेत अस्पृश्यांना स्वतंत्र मतदार देण्याच्या मुद्द्यावरून महात्मा गांधी आणि डॉ. बाबासाहेब आंबेडकर यांच्यात तीव्र मतभेद झाले.
- 1931 : फेडरल स्ट्रक्चर कमिटीची बैठक झाली. भारताला संघराज्यात्मक राज्यघटना देण्यात यावी, असा विचार पहिल्या गोलमेज परिषदेत झाला होता. म्हणून दुसऱ्या गोलमेज परिषदेत भारताला भावी राज्यघटनेचे स्वरुप कसे असावे यावर विचारविनिमय झाला आणि ‘फेडरल स्ट्रक्चर कमिटी’ म्हणजेच एक प्रकारची संविधान समिती नेमण्यात आली, व तिच्यावर भारताच्या भावी संविधानाविषयी विचारविनिमय करण्याची जबाबदारी सोपण्यात आली. 38 विद्वानांना या समितीचे प्रतिनिधी म्हणून नियुक्त केले गेले, ज्यात काही ब्रिटिश प्रतिनिधी आणि काही भारतीय प्रतिनिधी होते. या भारतीय प्रतिनिधींमध्ये डॉ. बाबासाहेब आंबेडकरांनाही स्थान मिळाले, व सोबतच सयाजीराव गायकवाड, इतर संस्थानिक, म. गांधी, बॅ. जयकर, सर तेजबहादूर सप्रू इत्यादी भारतीयही समितीचे प्रतिनिधी होते. ‘फेडरल स्ट्रक्चर कमिटी’ या घटना समितीचे अध्यक्ष लॉर्ड सँकी होते. त्यांच्या अध्यक्षतेखाली 7 सप्टेंबर 1931 ते 4 नोव्हेंबर 1931 या कालावधीत बंकिंगहॅम पॅलेसमध्ये घटना समितीच्या बैठका घेण्यात आल्या. बैठकांत डॉ. बाबासाहेब आंबेडकरांनी विद्वतेने युक्त विचार मांडले ज्यामुळे अध्यक्षांसह सर्व सभासद डॉ. आंबेडकरांच्या बुद्धिमत्तेवर प्रभावित झाले. चर्चेत आंबेडकर विविध देशांतील राज्यघटनांच्या कलमांचा आधार देऊन बिनतोड उत्तरे देत.
- 1943 : डॉ. बाबासाहेब आंबेडकरांच्या उपस्थितीत त्रिपक्षीय मजूर परिषदेचे दुसरे अधिवेशन झाले. अन्न, वस्त्र, निवारा, शिक्षण, सांस्कृतिक साधने आणि आरोग्याचे साधने याविषयी कामगारांच्या मागण्यांबद्दल बाबासाहेबांनी विवेचन केले. (6-7 सप्टेंबर 1943)
8 सप्टेंबर
- 1936 : शीख धर्माचा अभ्यास करण्यासाठी डॉ. बाबासाहेब आंबेडकरांच्या समर्थक गटातील 16 लोकांची एक तुकडी अमृतसर, पंजाब येथे रवाना झाली.
- 1932 : ब्रिटिश पंतप्रधान रॅक्से मॅकडोनाल्ड यांचे स्वतंत्र मतदार संघासंबंधी महात्मा गांधींना पत्र आले.
- 1956 : डॉ. बाबासाहेब आंबेडकरांनी दिल्लीवरून वामनराव गोडबोले यांना पत्र लिहिले.
- जागतिक साक्षरता दिन
9 सप्टेंबर
- 1906 : राजर्षी शाहू महाराज व व्हाईसरॉय लॉर्ड मेंटो यांची शिमला येथे भेट झाली.
- 1930 : लंडन येथील गोलमेज परिषदेत भारतीय अस्पृश्यांचे प्रतिनिधी म्हणून डॉ. बाबासाहेब आंबेडकरांना निमंत्रण देण्यात आले.
- 1937 : राजगृह, मुंबई येथे जैन धर्मियांची धर्मांतरासंबंधी डॉ. बाबासाहेब आंबेडकरांची चर्चा झाली.
- 1943 : मजूर परिषदेच्या खुल्या अधिवेशनात औद्योगीकरणावर तसेच बंगाल सरकारने स्थापलेल्या मजूर संघ सल्लागार संघासमोर दिल्लीमध्ये डॉ. बाबासाहेब आंबेडकरांचे भाषण झाले. Timeline of Dr Ambedkar in September
10 सप्टेंबर
- 1944 : मुंबईतील माटुंगा लेबर कॅम्प येथे भरलेल्या संत, महंत व गोसाव्यांच्या परिषदेमध्ये डॉ. बाबासाहेब आंबेडकरांनी सहभाग घेतला. हिंदू धर्म मठातर्फे गैगीनाथ महाराजांच्या अध्यक्षतेखाली ही परिषद झाली होती.
- 1949 : संपत्तीच्या मोबदल्यासंबंधीच्या सुधारित कलमाचा मसुदा पंतप्रधान जवाहरलाल नेहरू यांनी मांडला.
- डॉ. बाबासाहेब आंबेडकरांचे स्वातंत्र्य आणि समतेबद्दलचे विचार
- डॉ. बाबासाहेब आंबेडकरांबद्दल नोबेल पुरस्कार विजेत्यांचे विचार
11 सप्टेंबर
- 1930 : गोलमेज परिषदेसाठी नेमलेल्या प्रतिनिधींची यादी जाहीर करण्यात आली.
- 1938 : पुणे येथे अकरावे अस्पृश्य विद्यार्थी संमेलन झाले.
- 1938 : मुंबई विधिमंडळात ‘औद्योगिक तंटा’ या विधेयकावर बोलताना कामगारांचा संप करण्याचा हक्क डावण्यास डॉ. बाबासाहेब आंबेडकरांनी तीव्र विरोध केला.
- 1948 : कराची, पाकिस्तान येथे बॅरिस्टर महंमद अली जिना यांचे निधन झाले.
- आ. विनोबा भावे जयंती (1895)
12 सप्टेंबर
- 1929 : स्पृश्यास्पृश्य विचार या विषयावर नाशिक रोड येथे संत गाडगे महाराज यांचे जाहीर व्याख्यान झाले.
- 1954 : डॉ. बाबासाहेब आंबेडकरांनी राज्यसभेत ‘अस्पृश्यता विषयक गुन्हे’ या बिलावर अभ्यासपूर्वक प्रतिपादन केले. Timeline of Dr Ambedkar in September
13 सप्टेंबर
- 1929 : नांदगाव येथे श्री सोमवंशी मेळाव्यात डॉ. बाबासाहेब आंबेडकरांचे भाषण झाले.
- 1939 : कोल्हापूर संस्थान दलित प्रजा परिषदेतील डॉ. बाबासाहेब आंबेडकरांचे अध्यक्ष भाषण ‘जनता’ मध्ये प्रसिद्ध झाले.
14 सप्टेंबर
- राष्ट्रीय हिंदी दिवस (1949 – संविधान सभेकडून हिंदीचा अधिकृत भाषा म्हणून स्वीकार झाला.)
- 1956 : डॉ. बाबासाहेब आंबेडकरांनी पंतप्रधान जवाहरलाल नेहरू यांना ‘भगवान बुद्ध आणि त्यांचा धम्म’ या ग्रंथाची टंकलिखत प्रत भेट दिली.
15 सप्टेंबर
- 1954 : राज्यघटनेच्या वारंवार दुरुस्तीसंबंधी राज्यसभेत डॉ. बाबासाहेब आंबेडकरांचे भाषण झाले.
- 2002 : नानकचंद रत्तू पुण्यतिथी (बाबासाहेबांचे खाजगी सचिव)
- राष्ट्रीय अभियंता दिवस (मोक्षगुंडम विश्वेश्वरय्या जयंती 1861)
16 सप्टेंबर
- 1931 : बकिंगहॅम पॅलेस, लंडन येथील संघराज्य रचना समितीच्या बैठकीत डॉ. बाबासाहेब आंबेडकरांचे भाषण झाले.
- 1954 : डॉ. बाबासाहेब आंबेडकरांचे अस्पृश्यता गुन्हे बिल यावर राज्यसभेत भाषण झाले.
- भारतरत्न व रॅमन मॅगसेसे पुरस्कार विजेत्या संगीतकार एम. एस. सुब्बालक्ष्मी जन्मदिवस (1916)
- कामगार शिक्षण दिन
Timeline of Dr. Babasaheb Ambedkar in September
17 सप्टेंबर
- 1927 : सत्याग्रह करून आपण आपले हक्क प्रस्थापित केले पाहिजेत असे प्रतिपादन डॉ. बाबासाहेब आंबेडकरांनी केले. महाड सत्याग्रहाची पहिली जाहीर सभा, एल्फिन्स्टन रोड, मुंबई येथे झाली.
- 1937 : डॉ. बाबासाहेब आंबेडकरांनी मुंबई विधिमंडळात खोती व महार वतन नष्ट करणाऱ्या बिलावर भाषणे केली. कोकणातील खोती नष्ट करणारे विधेयक मुंबई विधिमंडळासमोर सादर करण्यात आले.
- 1943 : इंडियन फेडरेशन ऑफ लेबर या संस्थेतर्फे निवडक कार्यकर्त्यांच्या शिक्षण वर्गाचा समारोप झाला. ‘मजूर आणि संसदीय लोकशाही’ या विषयावर डॉ. बाबासाहेब आंबेडकरांचे भाषण झाले.
- भैय्यासाहेब उर्फ यशवंतराव आंबेडकर स्मृतिदिन
- अनागरिक धम्मपाल जयंती
- पेरियार रामसामी नायकर जयंती (1879)
18 सप्टेंबर
- 1931 : डॉ. बाबासाहेब आंबेडकर व महात्मा गांधी यांची लंडन येथे दुसरी मुलाखत झाली.
- 1936 : डॉ. बाबासाहेब आंबेडकरांनी ‘खोती बिल’ मुंबई विधिमंडळात मांडले. Timeline of Dr Ambedkar in September
19 सप्टेंबर
- 1932 : डॉ. बाबासाहेब आंबेडकरांचे महात्मा गांधींना वाचवण्यासाठी मर्चंट हॉल मुंबई येथे भाषण झाले. “महात्मा गांधींचे प्राण वाचवण्यासाठी मी माझ्या बांधवांच्या न्याय्य हक्काला हरताळ फासण्यास कारणीभूत होणार नाही”, असे उद्गार डॉ. बाबासाहेब आंबेडकरांनी काढले. हिंदू नेत्यांची सभा, इंडियन मर्चंट्स हॉल, मुंबई
- 1934 : डॉ. बाबासाहेब आंबेडकरांनी पुणे कराराच्या स्मृती जागृत ठेवण्याकरता पोयबावडी, परळी, मुंबई येथे एक सभा आयोजित केली होती. “गुलाम म्हणून आपण किती दिवस सहन करणार?”, असे बाबासाहेब भाषणात म्हणाले.
- 1937 : स्वतंत्र मजूर पक्ष कार्यकारी मंडळाची सभा झाली.
- 1951 : संसदेत हिंदू कोड बिलावर बोलताना ‘विवाह आणि घटस्फोट’ हा भाग स्वतंत्र विधेयक मानण्यात यावे असे निवेदन डॉ. बाबासाहेब आंबेडकरांनी केले.
20 सप्टेंबर
- 1932 : अस्पृश्यांना ‘स्वतंत्र मतदार संघ’ बहाल केल्याच्या निर्णयाविरुद्ध महात्मा गांधींचे येरवडा तुरुंगात आमरण उपोषण सुरू झाले. अस्पृश्यांच्या हक्का संबंधी डॉ. बाबासाहेब आंबेडकर यांची प्रतिज्ञा झाली.
- 1942 : शेड्युल्ड कास्ट्स फेडरेशन पक्षाची घटना मंजूर झाली.
- 1944 : हैदराबाद राज्य ‘शेड्युल्ड कास्ट्स फेडरेशन’च्या महिला व विद्यार्थी शाखांकडून मानपत्र देऊन डॉ. बाबासाहेब आंबेडकरांचा सत्कार करण्यात आला.
21 सप्टेंबर
- आंतरराष्ट्रीय शांतता दिन (1981)
- 1932 : पुणे कराराचा मध्यवर्ती मानबिंदू ठरवण्यात आला.
22 सप्टेंबर
- 1944 : डॉ. बाबासाहेब आंबेडकरांना मद्रास महापालिकेकडून मेयरच्या हस्ते चांदीच्या करंड्यातून मानपत्र अर्पण करण्यात आले. आंध्र चेंबर्स ऑफ कॉमर्स, मद्रास तर्फे मानपत्र देण्यात आले.
- कर्मवीर भाऊराव पाटील जयंती (1987)
23 सप्टेंबर
- 1917 : संकल्प दिवस – डॉ. बाबासाहेब आंबेडकरांनी बडोद्यात जातिवाद निर्मूलनाचा संकल्प केला. जातीमुळे त्यांना घरातून हाकलून देण्यात आले आणि त्यांनी संपूर्ण रात्र बागेत झाडाखाली काढली.
- 1944 : पेरियार रामस्वामी आणि डॉ. बाबासाहेब आंबेडकर यांची भेट झाली.
- 1944 : मद्रास येथे शेड्युल्ड कास्ट्स फेडरेशनच्या कार्यकारी मंडळाच्या बैठकीला डॉ. बाबासाहेब आंबेडकर उपस्थित होते.
- 1944 : मद्रास रेल्वे अस्पृश्य वर्गीय कामगारांतर्फे मजूर मंत्री डॉ. बाबासाहेब आंबेडकरांना मानपत्र देण्यात आले.
- 1956 : डॉ. बाबासाहेब आंबेडकर यांनी आपण विजयादशमीला 14 ऑक्टोबर 1956 रोजी नागपूरला सकाळी बौद्ध धर्म स्वीकारणार असल्याचे प्रसारमाध्यमांतून जाहीर केले.
24 सप्टेंबर
- 1873 : महात्मा फुले यांनी पुणे येथे सत्यशोधक समाजाची स्थापना केली.
- 1932 : डॉ. बाबासाहेब आंबेडकर आणि महात्मा गांधी यांच्यात पुणे करार झाला. काँग्रेस नेत्यांशी वाटाघाटी झाली आणि शेवटी तडजोड मान्य होऊन त्या करारावर उभय पक्षाच्या नेत्यांच्या सह्या झाल्या, ज्याला ‘पुणे करार’ म्हणून ओळखले जाते. डॉ. बाबासाहेब आंबेडकर आणि पंडित मदन मोहन मालवीय यांच्या पुणे करारावर सह्या झाल्या.
- 1941 : परळी येथील सभेत “इंग्रजांना वाचवण्यासाठी नव्हे तर आपल्या घराची राख रांगोळी होऊ नये म्हणून सैन्यात सामील व्हा”, असे डॉ. बाबासाहेब आंबेडकरांनी अस्पृश्यांना आवाहन केले.
- 1944 : मद्रास येथे बुद्धिवादी सभेने (रॅशनॅलिस्ट असोसिएशन) आयोजित केलेल्या सभेत भाषण करताना डॉ. बाबासाहेब आंबेडकरांनी वेदांवर व गीतेवर टीका करून कडाडून हल्ला केला होता.
25 सप्टेंबर
- 1930 : पनवेल जवळ चिरनेर खेड्यात जंगल सत्याग्रह झाला.
- 1932 : पुणे करारास पाठिंबासाठी मुंबईत सह्या करण्यात आल्या.
- 1992 : ‘डॉ. आंबेडकर’ हा तेलुगू चित्रपट प्रदर्शित झाला. या चित्रपटाचे दिग्दर्शक परपल्ली भारत होते, तर अभिनेता आकाश खुराना यांनी बाबासाहेबांची भूमिका साकारली होती. (पहा – बाबासाहेबांच्या चित्रपटांची यादी)
- बॅरिस्टर खोब्रागडे जयंती
- दीनदयाल उपाध्याय जयंती (1916)
26 सप्टेंबर
- 1936 : सवर्ण हिंदुंनी अस्पृश्यांवर केलेल्या अत्याचाराची सरकारी अधिकाऱ्यांनी चौकशी करून आवश्यक ती कारवाई करावी अशी विनंती पतितपावन मध्ये आर. जी. घोडीयोर, भंडारा यांनी प्रसिद्ध केली.
- 1944 : आंध्र प्रदेशातील काकीनाडा येथील सभेत डॉ. बाबासाहेब आंबेडकरांना मानपत्र अर्पण करण्यात आले.
- पं. ईश्वरचंद्र विद्यासागर जयंती (1820)
27 सप्टेंबर
- जागतिक पर्यटन दिन
- 1932 : (पुणे करारानंतर) महात्मा गांधींनी उपोषण सोडले.
- 1951 : हिंदू कोड बिलाच्या मान्यतेवरून झालेल्या वाद-विवादानंतर डॉ. बाबासाहेब आंबेडकरांनी आपला कायदेमंत्री पदाचा राजीनामा पंतप्रधान नेहरू यांना सोपवला. नेहरुंनी तो त्याच दिवशी स्वीकारला पण 1 ऑक्टोबर, 1951 रोजी डॉ. आंबेडकरांनी नेहरूंना पत्र पाठवून अशी विनंती केली की 6 ऑक्टोबर, 1951 रोजी लोकसभेत आपल्या राजीनाम्याविषयी निवेदन करेपर्यंत हा राजीनामा तहकूब समजावा. 4 ऑक्टोबर, 1951 रोजी नेहरूंनी आंबेडकरांना त्यांची विनंती मान्य केल्याचे कळवले. 6 ऑक्टोबर, 1951 रोजी सकाळी 10 ते 11 वाजण्याच्या दरम्यान लोकसभेत डॉ. आंबेडकर आपले राजीनाम्याचे निवेदन वाचून दाखविणार होते. परंतु लोकसभेचे उपसभापती अनंतशयनम अय्यंगार यांनी सायंकाळी 6 वाजता निवेदन वाचण्याचा आदेश दिला. वेळेतील हा बदल डॉ. आंबेडकरांना अन्यायकारक वाटल्यामुळे ते रागातच लोकसभेतून बाहेर पडले. लोकसभेबाहेर त्यांनी आपले राजीनाम्यासंबंधीचे लिखित निवेदन वर्तमानपत्रांच्या प्रतिनिधींना दिले. त्या निवेदनात आंबेडकरांनी आपल्या राजीनाम्यामागची कारणे दिली होती.
28 सप्टेंबर
- 1931 : अल्पसंख्यांक समितीच्या कार्यास प्रारंभ झाला.
- 1932 : “देवालयात गेल्याने तुमचा उद्धार होणार नाही”, हे पुणे करारानंतर केलेले पहिले जाहीर भाषण होय, जे त्यांनी मुंबई येथे केले होते. ही बीडीडी चाळ (मुंबई) वरळी पटांगणात जाहीर सभा होती.
- 1944 : डॉ. बाबासाहेब आंबेडकरांना राज्य महेंद्र येथे मानपत्र अर्पण करण्यात आले. उत्तरादाखल भाषणात, “गांधींना वर्णाश्रम धर्म नष्ट करावयाचा नाही. त्यांना दूरदृष्टी मुळीच नाही,” असे उद्गार त्यांनी काढले.
- 1952 : जनसंमेलन, नरे पार्क, मुंबई येथे “सार्वजनिक पैशांचा अपहार करण्यासारखे नीच कृत्य दुसरे नाही”, असे उद्गार डॉ. बाबासाहेब आंबेडकरांनी काढले.
- भगतसिंग जयंती (1907)
29 सप्टेंबर
- 1934 : पुणे कराराची स्मृती जागृत ठेवण्यासाठी मुंबई येथे सभा झाली.
- 1950 : वरळी येथील बुद्ध मंदिरात डॉ. बाबासाहेब आंबेडकरांचे भाषण झाले.
- रावबहादूर एन. शिवराज जयंती व स्मृतिदिन
30 सप्टेंबर
- जागतिक भाषांतर दिन
- 1920 : डॉ. बाबासाहेब आंबेडकरांनी ‘लंडन स्कूल ऑफ इकॉनॉमिक्स अँड पॉलिटिकल सायन्स’ या संस्थेमध्ये एम.एस्सी. साठी पुन्हा प्रवेश घेतला. तसेच ‘ग्रेज इन’ या संस्थेत नाव दाखल करून कायद्याचा सुद्धा अभ्यास पुन्हा सुरू केला.
- 1956 : शेड्युल्ड कास्ट्स फेडरेशनच्या कार्यकारीणीची बैठक डॉ. बाबासाहेब आंबेडकरांच्या दिल्ली निवासस्थानी संपन्न झाली. एक पक्षीय हुकूमशाही पासून लोकशाहीचे रक्षण करण्याकरता बलवान विरोधी पक्ष स्थापन करण्याचे व त्या पक्षाला ‘रिपब्लिकन पार्टी ऑफ इंडिया’ हे नाव देण्याचे निश्चित करण्यात आले. तसेच त्यात ‘शेड्युल्ड कास्ट्स फेडरेशन’चे विसर्जन करण्याचा ठराव सुद्धा संमत करण्यात आला.
सप्टेंबर मध्ये झालेल्या अन्य गोष्टी
- 1927 : सप्टेंबर 1927 मध्ये आंबेडकरानुयायांद्वारे डॉ. भीमराव आंबेडकरांना ‘बाबासाहेब’ टोपणनाव वा उपाधी दिली गेली आणि त्यांना ‘डॉ. बाबासाहेब आंबेडकर’ असे संबोधले जाऊ लागले.
- 1947 : सप्टेंबर 1947 मध्ये स्वतंत्र भारताचे पहिले कायदेमंत्री म्हणून डॉ. बाबासाहेब आंबेडकरांनी पदाची शपथ घेतली. 3 ऑगस्ट, 1947 रोजी भारताच्या मंत्रिमंडळातील मंत्र्यांची नावे जाहीर झाली होती आणि त्यात डॉ. आंबेडकरांची कायदे व न्यायमंत्री म्हणून नियुक्ती होती. त्यांनी सप्टेंबर 1947 ते ऑक्टोबर 1951 दरम्यान या पदावर कार्य केले.
डॉक्टर बाबासाहेब आंबेडकरांचे जीवनपट (महिन्यावर click करा)
* जानेवारी * फेब्रुवारी * मार्च * एप्रिल * मे * जून * जुलै * ऑगस्ट * सप्टेंबर * ऑक्टोबर * नोव्हेंबर * डिसेंबर *
सारांश
मैत्रिणींनो आणि मित्रांनो, आजच्या या पोस्टमध्ये आपण सप्टेंबर महिन्यातील डॉ. बाबासाहेब आंबेडकरांचा जीवनपट (Timeline of Dr Babasaheb Ambedkar in September) याविषयीची माहिती पाहिली.
डॉक्टर बाबासाहेब आंबेडकर यांचा इतिहास सांगणारा हा लेख तुम्हाला कसा वाटला हे आम्हाला नक्की सांगा. जर तुम्हाला ही माहिती आवडली असेल तर तुमच्या मित्रांपर्यंत पण नक्की शेअर करा.
सदर लेखात एखादी बाब समाविष्ट करायची राहून गेली असेल, किंवा लेखात कुठे व्याकरणीय चूक झाली असेल तर कृपया आम्हाला आवर्जून ईमेल द्वारे किंवा कॉमेंट बॉक्समध्ये लिहून कळवावे, धन्यवाद.
हे ही वाचलंत का?
- डॉ. बाबासाहेब आंबेडकर यांच्यावर प्रभाव टाकणाऱ्या व्यक्ती
- Wikipedia : 2021 मध्ये ‘मराठी विकिपीडिया’वर सर्वाधिक लोकप्रिय व्यक्ती कोण? जाणून घ्या…
- डॉ. बाबासाहेब आंबेडकर विषयक विविध लेख
- ‘धम्म भारत’चे अन्य लेख वाचा
‘धम्म भारत’ वर मराठी, हिंदी आणि इंग्रजीमध्ये लेख लिहिलेले आहेत:
मैत्रिणींनो व मित्रांनो, अशाच प्रकारचे लेख वाचण्यासाठी आणि धम्म भारतच्या नवीन लेखांचे notifications मिळवण्यासाठी स्क्रीनच्या खालील बाजूस उजवीकडे दिसणाऱ्या लाल रंगतील bell icon ला क्लिक करा.
डॉ. बाबासाहेब आंबेडकरांचा संग्रह |
जीवनचरित्र |
पुस्तके |
पुतळे |
सुविचार / Quotes |
दृष्टिकोन/ विचार |
कार्य आणि योगदान |
विकिपीडिया |
रंजक तथ्ये |
धम्म भारतला सोशल मिडिया माध्यमांवर फॉलो आणि सबस्क्राइब करा. |