SC caste in Marathi: महाराष्ट्रातील अनुसूचित जातींची यादी – लोकसंख्या आणि टक्केवारी

Last Updated on 4 October 2025 by Sandesh Hiwale

महाराष्ट्र राज्यात एकूण 59 अनुसूचित जाती (Scheduled Caste/ SC) आहेत. महाराष्ट्रातील अनुसूचित जातींची यादी आणि 2011 च्या जनगणनेनुसार प्रत्येक अनुसूचित जातीची लोकसंख्या आणि त्यांचे अनुसूचित जाती मधील प्रमाण (टक्केवारी) या लेखात दिली आहे. — List of Scheduled Castes in Maharashtra

 Read this article in English 

अनुसूचित जाती म्हणजे काय?

राज्यातील अनुसूचित जातींची यादी जाणून घेण्यापूर्वी आपण अनुसूचित जाती म्हणजे काय ते समजून घेऊयात.

अनुसूचित जाती प्रवर्ग म्हणजे काय? अनुसूचित जाती (शेड्युल्ड कास्ट) ही संज्ञा प्रथम सायमन कमिशनने वापरली व तीच पुढे 1935च्या कायद्यात अंतर्भूत करण्यात आली. सामान्यतः अस्पृश्य मानल्या गेलेल्या जातींचा समावेश अनुसूचित जातीत होतो. 1935च्या कायद्याच्या परिशिष्टात अशा अनुसूचित जातींची पहिली अधिकृत यादी प्रकाशित करण्यात आली.

भारतीय लोकसंख्येमध्ये पूर्वाश्रमीच्या अस्पृश्यांचे म्हणजे आजच्या दलितांचे / अनुसूचीत जातींचे प्रमाण 16.6 टक्के आहे. वासाहतिक सत्ताधाऱ्यांनी 1850 पासून 1936 पर्यंत दलितांना ढोबळपणे ‘डिप्रेस्ड क्लासेस‘ असे संबोधले होते. 1931-32 मधल्या गोलमेज परिषदेनंतर झालेल्या सांप्रदायिक निवाड्याचा परिणाम म्हणून वासाहतिक सत्ताधाऱ्यांनी अस्पृश्य जातींसाठी एक सूची तयार केली. त्यातून ‘अनुसूचीत जाती’ (शेड्युल्ड कास्ट्स) ही एक प्रशासकीय कोटी निर्माण झाली. वसाहतोत्तर भारताने ‘घटना (अनुसूचीत जाती) आदेश, 1950 अनुसार ही सूची स्वीकारली. त्यामध्ये 29 राज्यांमधील 1,108 जातींची नोंदणी करण्यात आलेली होती.

आधीच प्रचंड संख्या असलेल्या या सूचीतील जातींचा आकडा अंतिम स्वरूपाचा मात्र नाही. यातील प्रत्येक जातीच्या आणखी डझनावारी उपजाती आणि उप-उपजाती असू शकतात, त्यांच्यात अंतर्गत उतरंडीची भावना असू शकते.

• हेही पाहा : महाराष्ट्रातील अनुसूचित जामातींची यादी (जमातीवार लोकसंख्येसह)

 

अनुसूचित जातींची लोकसंख्या

SC Caste List in Maharashtra Marathi :  2011 च्या जनगणनेनुसार, महाराष्ट्र राज्यातील Scheduled Caste (SC) अर्थात अनुसूचित जातींची लोकसंख्या 1,32,75,898 आहे जी राज्याच्या लोकसंख्येच्या 11.81% आहे. भारतातील अनुसूचित जातीची लोकसंख्या 20,13,78,086 किंवा 16.6% आहे (2011 च्या जनगणनेनुसार). भारतातील एकूण 20.14 कोटी अनुसूचित जातींपैकी 6.6% महाराष्ट्रात आहेत.

2011 च्या जनगणनेनुसार, महाराष्ट्रातील अनुसूचित जातींची लोकसंख्या 1,32,75,898 होती, जी राज्याच्या एकूण लोकसंख्येत 11.8% आहे. अनुसूचित जातींपैकी 67,67,759 पुरुष आणि 65,08,139 स्त्रिया होत्या.

अनुसूचित जातींची यादी (लोकसंख्येसह)

अनुसूचित जाती लिस्ट महाराष्ट्र : महाराष्ट्र राज्यात एकूण 59 अनुसूचित जाती आहेत. महाराष्ट्रातील अनुसूचित जातींची यादी आणि 2011 च्या जनगणनेनुसार प्रत्येक अनुसूचित जातीची लोकसंख्या खालीलप्रमाणे आहे.

---

महाराष्ट्रातील अनुसूचित जातींची एकूण लोकसंख्या 1,32,75,898 आहे. यामध्ये दोन गटांचा समावेश होतो –

1. 59 अनुसूचित जातींची लोकसंख्या: 1,28,66,780

2. Generic Castes (सामान्य जाती): 4,09,118

एकूण अनुसूचित जातींच्या लोकसंख्येमधून एखाद्या SC जातीचे प्रमाण काढायचे असल्यास, ते फक्त 59 अनुसूचित जातींच्या एकत्रित लोकसंख्येमधूनच (1,28,66,780) काढले जाते, त्यामध्ये generic castes ची लोकसंख्या जोडली जात नाही. कारण generic castes (सामान्य जाती) या 59 जातींव्यतिरिक्त स्वतंत्र स्वरूपात नोंदल्या गेल्या असून, त्या 59 जातींच्या तुलनात्मक अभ्यासासाठी सुसंगत ठरत नाहीत. 

बार्टीने देखील आपल्या अहवालात याच पद्धतीचा अवलंब केला आहे. त्यांनी SC जातींचे प्रमाण काढताना एकूण 59 अनुसूचित जातीसह generic castes ची लोकसंख्या (1,32,75,898) विचारात घेतल्या नाहीत आणि केवळ 59 जातींच्या लोकसंख्येच्या आधारे मोजमाप केले आहे. 

---

2011 च्या जनगणनेनुसार, महाराष्ट्र राज्याची लोकसंख्या 11,23,74,333 असून त्यापैकी अनुसूचित जातींची लोकसंख्या 1,32,75,898 (11.81%) आहे. 2021 मध्ये राष्ट्रीय जनगणना झाली नाही, त्यामुळे 2011 ची जनगणना ही नवीनतम जनगणना आहे.

2011 च्या जनगणनेनुसार, महाराष्ट्रात साक्षरतेचे प्रमाण 82.91 टक्के आहे तर अनुसूचित जातीचे 79.66% आहे.

 

लोकसंख्येनुसार अनुसूचित जातीचे वर्गीकरण

महाराष्ट्रातील 59 अनुसूचित जातींपैकी 25 अशा आहेत ज्यांची लोकसंख्या 1,000 पेक्षा कमी आहे, तर 1,00,000 पेक्षा जास्त लोकसंख्या असलेल्या 9 अनुसूचित जाती आहेत.

• 1 ते 100 लोकसंख्या – 9 जाती
• 101 ते 1,000 लोकसंख्या – 16 जाती
• 1,001 ते 10,000 लोकसंख्या – 14 जाती
• 10,001 ते 50,000 लोकसंख्या – 11 जाती
• 50,001 ते 1,00,000 लोकसंख्या – 2 जाती
• 1,00,001 ते 5,00,000 लोकसंख्या – 4 जाती
• 5,00,001 ते 25,00,000 लोकसंख्या – 2 जाती
• 25,00,001 ते 85,00,000 लोकसंख्या – 1 जात

सर्वाधिक लोकसंख्या असलेल्या 10 अनुसूचित जाती

2011 च्या जनगणनेनुसार, सर्वाधिक लोकसंख्या असणाऱ्या महाराष्ट्रातील अनुसूचित जातींची यादी खालीलप्रमाणे आहेत :

1. महार – 80,06,060 (62.22%)
2. मांग – 24,88,531 (19.34%)
3. चांभार – 14,11,072 (10.97%)
4. भंगी – 2,17,166 (1.69%)
5. ढोर – 1,16,287 (0.90%)
6. होलार – 1,08,908 (0.85%)
7. खाटीक – 1,08,491 (0.84%)
8. मादगी – 56,481 (0.44%)
9. बसोर – 55,564 (0.43%)
10. मेंघवाल – 40,416 (0.31%)

2011 च्या जनगणनेनुसार, महार, मांग आणि चांभार हे तीन जातसमूह एकूण अनुसूचित जातीच्या लोकसंख्येच्या 92.53 टक्के आहेत. तर उर्वरित 56 अनुसूचित जाती लोकसंख्येच्या 7.47 टक्के आहेत.

मागील अर्थात 2001 च्या जनगणनेनुसार, महार (57.8%), मांग (20.4%), व चांभार (12.6%) या अनुसूचित जातींमधील तीन प्रमुख समुदायांची लोकसंख्या 91.8% होती. तर उर्वरित 56 अनुसूचित जाती लोकसंख्येच्या 9.2 टक्के आहेत.

2001 ते 2011 या दरम्यान, अनुसूचित जातींमधील महारांचे प्रमाण वाढले आहे (57 टक्के वरून 62 टक्के). तर मांग (20 टक्के वरून 19 टक्के) आणि चांभार (12 टक्के वरून 11 टक्के) या जातींचे प्रमाण घटल्याचे दिसून येते.

2011 च्या जनगणनेनुसार, लातूर जिल्ह्यात अनुसूचित जातीचे सर्वाधिक प्रमाण (19.4%) आहे. पुणे जिल्ह्यात अनुसूचित जातींची लोकसंख्या सर्वाधिक (11.81 लाख) आहे.

• हेही पाहा : अनुसूचित जातींचे उपवर्गीकरण केले तर कोणत्या जातीला किती टक्के आरक्षण मिळेल?
•  हेही पाहा : Caste census of Bombay 1951 (pdf)

 

लोकसंख्येबाबत गावनिहाय माहिती

अनुसूचित जातीच्या लोकसंख्येबाबत गावनिहाय माहिती खालीलप्रमाणे:

100% अनु. जाती — 34 गावे
75 ते 100% अनु. जाती — 168 गावे
50 ते 75% अनु. जाती — 500 गावे
1 ते 50% अनु. जाती — 32,416 गावे
0% अनु. जाती — 7,841 गावे

2011 च्या जनगणनेनुसार, महाराष्ट्र राज्यातील एकूण गावांची संख्या 40,959 आहे, ज्यांपैकी 702 गावांमध्ये 50 टक्के पेक्षा अधिक लोकसंख्या अनुसूचित जातीची आहे. महाराष्ट्रातील एकूण दलित वस्त्या 40,587 आहेत.

 

दारिद्र रेषेखालील कुटुंबे

2011 च्या जनगणनेनुसार, महाराष्ट्रात 2,38,30,580 कुटुंबे आहेत, त्यापैकी 33,11,405 कुटुंबे अनुसूचित जातीची आहेत.

दारिद्र्यरेषेखालील कुटुंब सर्वेक्षण (2002 ते 2007) नुसार, महाराष्ट्र राज्यामध्ये दारिद्र्य रेषेखालील कुटुंबे 45,02,450 आहेत, त्यापैकी अनुसूचित जातीची कुटुंबे 10,12,000 (22.48%) आहेत.

2011 ची जनगणना आणि 2002-07 चे कुटुंब सर्वेक्षण यांच्यातील आकडेवारी एकत्रित अभ्यासली असता आढळते की, राज्यातील 30% पेक्षा अधिक अनुसूचित जातीची कुटुंबे ही दारिद्र्य रेषेखालील म्हणजेच अत्यंत गरीब आहेत.

 

भूधारकांची संख्या

कृषी गणना 2005-06 नुसार, महाराष्ट्रात एकूण भूधारकांची संख्या 11 कोटी 43 लाख आहे, यांमध्ये अनुसूचित जातीच्या भूधारकांची संख्या 10.57 लाख (9.25%) आहे. राज्यातील भूधारकांकडे एकूण जमीन 168.94 लाख हेक्टर असून त्यामध्ये अनुसूचित जातीच्या भूधारकांकडे एकूण जमीन 12.20 लाख हेक्टर (7.22%) आहे.

 

अनुसूचित जातींना आरक्षण

महाराष्ट्रात, शैक्षणिक संस्था आणि सरकारी नोकऱ्यांमध्ये सामाजिक, शैक्षणिक आणि आर्थिकदृष्ट्या मागासलेल्या घटकांसाठी (SC, ST, OBC) एकूण 62 टक्के आरक्षण आहे. त्यापैकी 13 टक्के आरक्षण अनुसूचित जातीसाठी आहे. महाराष्ट्रात एकूण 48 लोकसभा मतदारसंघ आहेत त्यापैकी पाच लोकसभा मतदारसंघ हे अनुसूचित जातींसाठी राखीव आहेत. महाराष्ट्र विधानसभेच्या 288 पैकी 33 विधानसभा मतदारसंघ हे अनुसूचित जातींसाठी राखीव आहेत.

‘एससी आरक्षणातील उपवर्गीकरण’ हा महत्त्वाचा मुद्दा सध्या अनुसूचित जातींमध्ये चर्चेचा विषय आहे. आरक्षणातील उपवर्गीकरणानंतर कोणत्या जातीला किती आरक्षण मिळू शकते हे ‘इथे’ पाहा.

 

धर्मनिहाय लोकसंख्या

“संविधानाच्या परिच्छेद 3 नुसार, हिंदू, शीख किंवा बौद्ध धर्माव्यतिरिक्त कोणत्याही धर्मातील व्यक्तीला अनुसूचित जातीचे मानले जाणार नाही. म्हणजेच धर्माने केवळ हिंदू, बौद्ध किंवा शीख असलेली व्यक्तीच अनुसूचित जातीसाठी असलेल्या आरक्षणाचा लाभ घेऊ शकते. “ज्या दलित नागरिकाने ख्रिश्चन किंवा इस्लाम धर्म स्वीकारला आहे, त्याला कोणत्याही अनुसूचित जातीच्या आरक्षणाचा लाभ घेता येणार नाही.

त्याला लोकसभा किंवा विधानसभा निवडणुकीत अनुसूचित जातीच्या आरक्षित जागेवरुन निवडणूक लढता येणार नाही. त्याला शैक्षणिक संस्थांमध्ये आणि सरकारी नोकऱ्यांमध्ये असलेल्या अनुसूचित जातीच्या आरक्षणाचा लाभ घेता येणार नाही. 1950 मध्ये तत्कालीन पंतप्रधान जवाहरलाल नेहरु यांच्या सरकारने अनुसूचित जातींची व्याख्या स्पष्ट करताना केवळ हिंदू धर्मावर आस्था असणारी व्यक्ती अशी केली होती. नंतर 1956 मध्ये या व्याख्येची व्याप्ती वाढवून हिंदू धर्मासह शीख आणि बौद्ध धर्मांचाही यात समावेश करण्यात आला होता.

कायदेशीररीत्या, अनुसूचित जातीची व्यक्ती धर्माने केवळ हिंदू, बौद्ध किंवा शीख असू शकते, या तिघांव्यतिरिक्त अन्य नाही. म्हणून, 59 अनुसूचित जातींमध्ये, प्रत्येक जातीची लोकसंख्या हिंदू, बौद्ध आणि शीख या तीन धर्मांमध्ये विभागली गेली आहे.

2011 च्या जनगणनेनुसार, महाराष्ट्रातील अनुसूचित जातींची धर्मनिहाय लोकसंख्या खालीलप्रमाणे आहे.   ^{(संदर्भ)}

• हिंदू : 80,60,130 (60.71%)
• बौद्ध : 52,04,284 (39.20%)
• शीख : 11,484 (0.09%)
• एकूण : 1,32,75,898 (100%)

 

2011 च्या जनगणनेनुसार, राज्यात महारांची लोकसंख्या 80,06,060 असून त्यापैकी 49,43,821 बौद्ध, 30,54,158 हिंदू आणि 8,081 शीख आहेत. जर या 30.54 लाख ‘हिंदू महार’ लोकांची नोंदणी ‘बौद्ध महार’ म्हणून झाली असती तर खालीलप्रमाणे आकडेवारी असली असती.

• हिंदू : 50,05,972 (37.71%)
• बौद्ध : 82,58,442 (62.21%)
• शीख : 11,484 (0.09%)
• एकूण : 1,32,75,898 (100%)

अनेक महार, मांग लोकांनी तसेच इतर अनुसूचित जातींच्या लोकांनी जनगणनेत त्यांचा धर्म ख्रिश्चन धर्म (किंवा इस्लाम) म्हणून नोंदवला, परंतु त्यामुळे सरकारने त्यांची अनुसूचित जातीच्या लोकसंख्येमध्ये गणना केली नाही.

• महाराष्ट्रातील अनुसूचित जातींची धर्मनिहाय लोकसंख्या

---

1951 आणि 1961 मधील अनुसूचित जातींची लोकसंख्या

1951 मधील बॉम्बे राज्यातील अनुसूचित जातींची लोकसंख्या

1951 च्या जनगणनेनुसार, बॉम्बे राज्यातील एकूण अनुसूचित जाती लोकसंख्या 31,70,846 इतकी होती. त्यामध्ये प्रमुख तीन जाती पुढीलप्रमाणे होत्या :

• महार समाज : 17,42,812 (सुमारे 55%)

• मांग समाज : 4,17,665 (सुमारे 13%)

• चांभार समाज : 3,99,410 (सुमारे 12.6%)

• उर्वरित एससी जाती : 6,10,959 (सुमारे 19.4%)

1951 मध्ये मांग आणि चांभार या दोन्ही समाजांची लोकसंख्या जवळजवळ सारखी होती. तर, महार समाजाची लोकसंख्या ही मातंग समाजापेक्षा तब्बल चार पटींहून अधिक होती.

---

1961 मध्ये महार लोकसंख्येत घट का झाली?

1956 मध्ये डॉ. बाबासाहेब आंबेडकरांनी बौद्ध धर्म स्वीकारला आणि त्यांच्यासोबत लाखो महार समाजाने बौद्ध धर्माची दीक्षा घेतली.

• 1961 च्या जनगणनेत या नव्या बौद्धांनी फक्त धर्म “बौद्ध” अशी नोंद केली. तर काही बौद्धांनी अनुसूचित जातीला प्राधान्य देऊन ‘महार’ जात नोंदवली.

• त्या काळी जर कोणी धर्म बौद्ध नोंदवला, तर त्याला कोणतीही अनुसूचित जात नोंदवता येत नव्हती.

• तसेच कोणी जात महार नोंदवली, तर त्याला बौद्ध धर्म लिहिला येत नव्हता (फक्त हिंदू किंवा शीख लिहिता येत होता).

• त्यामुळे 1961 मध्ये महार समाजाची संख्या आकडेवारीत कमी झालेली दिसते.

यावेळी लोकसंख्या प्रमाण असे दिसून आले :

• महार समाज : 8,29,997 (33.95%)

• मांग समाज : 7,57,917 (30.99 %)

• चांभार समाज : 5,80,661 (23.78 %)

• उर्वरित 56 एससी जाती : 2,76,999 (11.28 %)

• एकूण एससी जाती : 24,45,584 (100 %)

यावरून दिसते की मोठ्या प्रमाणात महार समाजाने “महार” ही जात नोंदवली नाही, तर फक्त “बौद्ध” धर्म नोंदवला.

राष्ट्रीय जनगणनेच्या आकडेवारीवर नजर टाकली तर लक्षात येते की, 1951 साली महाराष्ट्रातील बौद्ध लोकसंख्या अवघी 2,487 इतकी होती. परंतु केवळ दहा वर्षांत, म्हणजे 1961 मध्ये, ही संख्या झपाट्याने वाढून तब्बल 27,89,501 इतकी झाली. यामध्ये प्रामुख्याने महार समाजातील लोकांनी मोठ्या प्रमाणावर बौद्ध धर्म स्वीकारलेला दिसतो.

याच वेळी, 1961 मध्ये 8.30 लाख लोकांची नोंद स्वतंत्रपणे ‘महार’ या गटात झाली होती. त्यामुळे त्या काळात बौद्ध व महार या दोन्ही गटांची एकत्रित लोकसंख्या प्रत्यक्षात 36 लाखांपेक्षा जास्त होती.

तुलनेत पाहता, मातंग समाजाची लोकसंख्या त्यावेळी 7.57 लाख होती, जी महारांच्या लोकसंख्येपेक्षा चारपट कमी होती. त्यामुळे 1961च्या जनगणनेचा दाखला देत ‘मातंगांची संख्या महारांच्या बरोबरीने आहे’ असा जो दावा काही मांग संघटनांकडून केला जातो, तो वस्तुतः चुकीचा असल्याचे जनगणनेच्या आकडेवारीतून स्पष्ट होते.

प्रत्यक्षात, ‘बौद्ध’ आणि ‘महार’ या दोन वेगळ्या गटांमध्ये लोकसंख्या विभागून नोंद झाल्यामुळे महारांची संख्या 1961 मध्ये कमी असल्याचा भास निर्माण झाला. हीच स्थिती पुढील दोन जनगणनांमध्ये (1971 व 1981) देखील कायम राहिली. 1981 च्या जनगणनेनुसार, महाराष्ट्रातील महार समाजाची लोकसंख्या 13.09 लाख (38.39%) इतकी होती.

---

1990 नंतरची स्थिती

1990 मध्ये बौद्ध समाजाला धर्म : बौद्ध आणि त्याचबरोबर जात : अनुसूचित जात अशी नोंद करण्याचा अधिकार मिळाला.

• त्यामुळे 1990 नंतर महार समाजाने मोठ्या प्रमाणात कधी “महार”, कधी “बौद्ध”, तर कधी दोन्ही नोंदी करायला सुरुवात केली.

• यामुळे पुढील जनगणनांमध्ये महार समाजाची खरी संख्या पुन्हा स्पष्टपणे दिसू लागली.

1991 च्या जनगणनेनुसार, महाराष्ट्रातील महार समाजाची लोकसंख्या 51.20 लाख (58.82%) इतकी होती. त्यानंतर 2001 मध्ये ही संख्या 56.79 लाख (58.82%) तर 2011 मध्ये तब्बल 80.06 लाख (62.22%) इतकी नोंदली गेली.

 

या वाढीच्या प्रवाहावरून पाहता, 2025-26 मध्ये होणाऱ्या आगामी जातनिहाय जनगणनेत महार समाजाची लोकसंख्या अनुसूचित जातींमध्ये सुमारे 65% पर्यंत पोहोचण्याची शक्यता आहे.

 

जर या नव्या (65%) लोकसंख्येच्या आधारावर SC आरक्षणातील उपवर्गीकरण केले गेले, तर महारांना मिळणारा अपेक्षित वाटा (विद्यमान 8% ऐवजी) अंदाजे 8.5% इतका असला असता. तथापि, उपवर्गीकरणाची अंमलबजावणी बहुधा 2011 च्या जनगणनेतील आकडेवारीवर आधारित राहण्याची शक्यता अधिक आहे.

• हेही पाहा: एससी आरक्षणातील उपवर्गीकरणानंतर कोणत्या जातीला किती टक्के आरक्षण मिळेल?

---

(बॉम्बे राज्यातील 1931 व 1951 मधील सर्व प्रवर्गातील जातींची लोकसंख्या पाहण्यासाठी येथे क्लिक करा.)

---

अनुसूचित जातींशी संबंधित काही महत्त्वाच्या गोष्टी

2011 च्या जनगणनेनुसार, अनुसूचित जातींची सर्वाधिक लोकसंख्या असलेले तीन जिल्हे खालीलप्रमाणे :

• पुणे जिल्हा (11.81 लाख/ 8.89%)
• नागपूर जिल्हा (8.68 लाख/ 6.34%)
• सोलापूर जिल्हा (6.5 लाख/ 4.89%)

 

अनुसूचित जातींची सर्वाधिक कमी लोकसंख्या असलेले तीन जिल्हे खालीलप्रमाणे :

• नंदुरबार जिल्हा (47,985)
• सिंधुदुर्ग जिल्हा (55,586)
• रत्नागिरी जिल्हा (66,948)